Abhi kuch hone ko hai..

Gazal


Aainaa hairaan hai aur asmaa rone ko hai
Is tamash-gaah mei ab aur kya hone ko hai

Kashtagan-e-dard ko jaan ki aman kaise mile
Zindagii ki har dua apana asar khone ko hai

Neend ke maare kisii sapne ki Khwaish kya kare
Har ghadi mehsoos hota hai sahar hone ko hai

Kis ke naqsh-e-paa ko samajhe apni manzil ka nishan
Jhaag udati mauj aakar har nishan dhone ko hai

Kash ye koi sitara ya koi jugnu kahe
har andhera kah raha hai roshani hone ko hai

Aye hawa-be-yaqini gul na kar ghar ke charag
Chand lamhe thahar ja kuch na kuch hone ko hai...........

Dosti Kya Hai

Kya Khabar Tum Ko Dosti Kya Hai
Ye Roshni Bhi Hai Andhera Bhi Hai

Khwahishon Say Bhara Jazeera Bhi Hai
Bahut Anmol ek Heera Bhi Hai

Dosti ek Haseen Khwab Bhi Hai
Pass Se Dekho To Sharab Bhi Hai

Dukh Milne Pe Ye Azaab Bhi Hai
Aur Ye Piyar Ka Jawaab Bhi Hai

Dosti Yoon To Maaya Jaal Bhi Hai
Ek Haqeeqat Bhi Hai Khayal Bhi Hai

Kabhi Furqat Kabhi Visaal Bhi Hai
Kabhi Zameen Kabhi Falak Bhi Hai

Dosti Jhoot Bhi Hai Such Bhi Hai
Dil Mei Reh Jaye To Kasak Bhi Hai

Kabhi Ye Haar Kabhi Jeet Bhi Hai
Dosti Saaz Bhi Sangeet Bhi Hai

Shaer Bhi Nazam Bhi Geet Bhi Hai
Wafa Mei Gaaya Hua Sangeet Bhi Hai

Dil Se Nikli Hui Ek Dua Bhi Hai
Kitna Samjhoge Kya Kya Bhi Hai
Bus Itna Samajh Lo Tum Akhir Mei
Pyar Ki Shruaat Aur Inteha Bhi Hai.


Mahtab Alam (Mushk)

Kabhi jo hum nahi hon ge

Kabhi jo hum nahi hon ge
kaho kis ko batao ge
wo apni uljhanain saari
wo bechaini mei doobe pal
wo ankhon mei chupe ansoo
kise phir tum dikhao ge
kabhi jo hum nahi hon ge

Mahtab Alam (Mushk)

Mana leti hai

Dosti main dooriyan to aati rehti hain
Phir bhi dosti dilon ko mila deti hai
Wo dost hi kiya jo naaraz na ho kabhi
Par sachchi dosti doston ko mana leti hai.

Mahtab Alam (Mushk)

Mana leti hai

Dosti main dooriyan to aati rehti hain
Phir bhi dosti dilon ko mila deti hai
Wo dost hi kiya jo naaraz na ho kabhi
Par sachchi dosti doston ko mana leti hai.

Mahtab Alam (Mushk)

zindagi hai mukhtasar

wabasta teri hayat se sabhi silsile hain magar
meri zindagi hai mukhtasar teri dosti ke liye


Mahtab Alam (Mushk)

Tujh se kahein

dukh fasaana nahi ke tujh se kahein
dil bhi maana nahi ke tujh se kahein ,
aaj tak apni bekali ka sabab
Khud bhi jana nahi ke tujh se kahein,
ek tu harf_aashna tha magar
ab zamana nahi ke tujh se kahein ,
be-tarah dil hai aur tujh se
dostana nahi ke tujh se kahein ,
ai Khuda dard-e-dil hai bakhshish-e-dost
aab-o-dana nahi ke tujh se kahein

Akhtar...

Na Kar Saka

Ankhon Se Log Pi Gaye Mere Dil Ka Raaz
Afsos Tere Gam Ki Hifaazat Na Kar Saka

Ik Khowab Us Ke Samne Dum Tor Ta Raha
Afsos Mera Maseha Koi Karamat Na Kar Saka

Us Ne Na Mujh Ko Visaal Ki Naemat Adaa Ki
Be Sood Main Bhi Us Ki Ibadat Na Kar Saka

Pakka Ghara Tha Pass Magar Phir Bhi Woh Udaas
Na Jane Kyun Darya Ko Par Karne Ki Himmat Na Kar Saka.

Mahtab Alam (Mushk)

Raam Kahani

Izhar-e-Mohabbat Mei Ek Umar Lagata Hai
Jo Shaksh In Aankho Se Kuch Lutf Uthata Hai

Kal Chand Ko Dekha Jab To Yeh Jan Liya Hum Ne
Yeh Husn Bhi Tere Hi Chehre Se Churata Hai

Dil Khol Kar Dekho To Yeh Husn Ki Zanjere
Jin Se Tu Mujhe Qaidi Umron Ka Banata Hai

Main Bhool To Jayon Par Ai Jaan Tujhe Kaise
Hai Koi Jo Khudh Apni Hasti Ko Mitata Hai

Dedar Ki Khatir Kyun Tu Kohe Tur Par Jata Hai
Woh Pyar Pe Aaye To Khudh hi Paas Bulata Hai

Zamana Hai ab Sirf mahtab Computer Ka
Yeh Raam Kahani To Kis Dil Ko Sunata Hai.

Mahtab Alam (Mushk)

Na The Aise

Hum Log Na The Aise
Hein Jaise Nazar Aate
Ai Waqt Gawaahi De
Hum Log Na The Aise

Yeh Sheher Na Tha Aisa
Yeh Rog Na The Aise
Deewar Na The Rishte
Ai Waqt Gawaahi De
Hum Log Na The Aise

Zandaan Na Thi Basti
Khaljaan Na Thi Hasti
Yoon Mout Na Thi Sasti
Ai Waqt Gawaahi De
Hum Log Na The Aise

Yeh Aaj Jo Soorat He
Halaat Na The Aise
Tafreeq Na Thi Aisi
Sanjog Na The Aise
Ai Waqt Gawaahi De
Hum Log Na The Aise

Mahtab Alam (Mushk)

Bachpan Ka Zamana

Bachpan Ka Zamana Hota Tha
Khushiyon Ka Khazana Hota Tha

Chahat Chaand Ko Paane Ki
Dil Titli Ka Deewana Hota Tha

Rone Ki Wajah Na Hoti Thi
Hasne Ka Bahana Hota Tha

Khabar Na Thi Kuch Subohon Ki
Na Shaamon Ka Thikana Hota Tha

Daadi Ki Kahani Hoti Thi
Pariyon Ka Fasana Hota Tha

Ghum Ki Zubaan Na Hoti Thi
Na Zakhmon Ka Paimana Hota Tha

Baarish Mei Kagaz Ki Kashti
Har Mausam Suhana Hota Tha

Woh Khel Woh Saathi Hote The
Har Rishta Nibhaana Hota Tha

Bachpan Ka Zamana Hota tha
Kiya Khoob Zamana Hota Tha.

Mahtab Alam (Mushk)

Shayari

Shayari har shayar ke dil ki zuban hoti hai
Izhar nahi par izhar ki ek adaa hoti hai.

Chhoo lete hain dil ke taron ko chupke se
Phir se zindagi ki koi nayi ebtaida hoti hai.

Kah dete hain har baat apne shair ke misre se
Raaze dil janne ki bhi raazdaan hoti hai.

Chhupi hai har lafz mei is ki ek nayi kahani
Pyar karne walon ki bhi dastaan hoti hai.

Kar deti hai ek madhur kaifiyat taari sab par
Hosh gawaane ki gumnaam dawaa hoti hai.

Dhoondh leti hai har woh raah jis par use chalna hai
Dil ki manzil tak pahoonchane ki paiyedaan hoti hai.

Mahtab Alam (Mushk)

Khaak Ho Jayenge

Aap Ko Chahiye Ek Umar, Asar Hone Tak
Kaun Jeeta Hai Teri Zulf Ke Sar Hone Tak.
Hum Ne Maana Ke Tum Tagaafil Na Karoge Lekin
Khaak Ho Jayenge Hum Tum Ko Khabar Hone Tak.

Mahtab Alam (Mushk)

Baat Nahi Karte

Ye Na Sochna Ghaafil Ho Gaya Teri Yaad Se Mahtab
Tumhari Khushi Samaj Kar Tum Se Baat Nahi Karte.

Mahtab Alam (Mushk)

Dua Maangi Hai

Tu hi mil jaaye mujhe ye hi kaafi hai
Meri har saans ne ye hi dua maangi hai
Jaane kyun dil khincha jata hai teri taraf
Kya tune bhi mujhe pane ki dua maangi hai.

Mahtab Alam (Mushk)

Gum Na Ho

Tumhari zindagi me koi gum na ho,
Tumhari aankhen kabhi num na ho.
Tumhe mile zindagi ki har khushi,
Bhale chaahe usme hum na ho.

Mahtab Alam (Mushk)

Mera Muqaddar Hota

Woh mera sab kuch hai lekin mera muqaddar nahi hai
Kash wo mera kuch bhi na hota bas mera muqaddar hota.

Mahtab Alam (Mushk)

Nahi jaati

kuch sitaron ki chamak nahi jaati
kuch yaadon ki khanak nahi jaati
kuch logon se hota hai aisa rishta
ke door reh kar bhi unki mehak nahi jaati.

Mahtab Alam (Mushk)

Taqdeer Se Chup Kar

Mujhe Maloom Hai Mera Mukaddar tum Nahi Lekin
Meri Taqdeer Se Chhup Kar Meri Ek Baar Ho Jao.

Mahtab Alam (Mushk)

Kitne Majboor Ho

Kitne majboor ho taqdeer ke haathon Mushk
Na use pane ka zarf hai na use khone ka Hosla.

Mahtab Alam (Mushk)

Bewafa nahi lagte

Na janay kiya hai us ki udaas ankhon mei Mahtab
Woh nazar chura ke bhi guzre to bewafa nahi lagte.

Mahtab Alam (Mushk)

Talash Kar

Rehne De Aasman..
Zamin Ki Talash Kar,
Sab Kuch Yahin Milega..
Na Kahin Aur Talash kar,
Har Arzoo Agar Ho Puri..
To Phir Jine Ka Kya Maza,
Jine Ke liye To bas Tu Ek
Kisi Wajah Ki Talash Kar..

Mahtab Alam (Mushk)

Kya Hai Maa

Jab Kabhi Zindagi Udaas Lage
Jab Kahin Bhi Sukoon Na Pao Tum

Koi Pursan-E-Haal Na Poochhe
Sari Duniya Se Haar Jao Tum

Tab Mere Dost Sirf ek Hasti
Tum Pe Nazren Karam Ki Dale Gi

Tum Se Saari Udasiyan Le Kar
Rahat-E-Qalb Tum Ko Bakhshe Gi

Jo Kahin Se Bhi Na Muyassar Ho
Woh Sukoon Maa Ke Paas Hai Humdum

Dekh Kar Dard Apne Bacchon Ka
Aankh Ho jati Hai Jis Ki Purnam

Dost Tujh Se Kahun Main, Kya Hai Maa
Muhabbaton Ka ek Jahan Hai Maa

Teri Duniya Main Gar Andhera Ho
Roshni Dene Ko phir Shama Hai Maa

Qadam Ke Neeche Hai Jannat Us Ke
Yaani Jannat Ka Aasman Hai Maa

Mashwara Mera Hai Tujhe Humdum
Todna Tu Na Kabhi, Maa Ka Bharam

Bande Woh Hi Kamal Rakhte Hain
Jo Apni Maa Ka Khayal Rakhte Hain

Ke Hadis Main Yeh Qalaam Hota Hai
Beta Maa Ka Ghulaam Hota Hai.

Mahtab Alam (Mushk)

Tum Se Hai

Ye Kamiyabian Izzat Ye Naam Tum Se Hai
Khuda Ne Jo Bhi Dia Hai Maqaam Tum Se Hai.

Tumhare Dam Se Hain Mere Lahoo Mei Khilte Gulab
Mere Wajood Ka Saara Nizaam Tum Se Hai.

Kahan Bisat-E-Jahan Aur Main Kam Sin-O- Nadan
Ye Meri Jeet Ka Sab Ehtemaam Tum Se Hai.

Jahan Jahan Hai Meri Dushmani Sabab Main Hoon
Jahan Jahan Hai Mera Ehteraam Tum Se Hai.

Mahtab Alam (Mushk)

EK KHUWAAB

Raat phir khuwaab main aa kar mujhse
Meri ammi ne kuch sawaal kiye
Usse pahley mujhey duaa yeh di
Khuda karey ke tu sau saal jiye
Unki aankhon mein mohobbat bhi thi
Aur chhupa afsos bhi tha
 
Ek aanso bhi tha un aankhon main
Jo chillata bhi tha, khamosh bhi tha
Mujhse poochcha ke bete kaisey ho
Koi diqqat to nahin hai tumko
 
Phir kaha!!!!
Tumko maloom hai kya
Main bari takleef main hoon
Jab se laiti hoon so nahin payee
Tumhaari wajah se main khul ke ro nahin payee
Terey gunaah mujhko saanp banke danstey hain
Farishtey aakar har roz fiqrey kastey hain
 
Tumhi bataao beta mainey kya kami ki thi
Merey samjhaney main kami thi kya
Ya meri tarbiyat adhoori thi
Kyon burey kaam roz kartey ho
Kyon nahin us khuda se dartey ho
Jisney tumko ye jaan bakshi hai
Jisney tumko amaan bakshi hai
Laut kar jiske paas jaana hai
 
Kya usey munh nahin dikhana hai
Kya tumhein is liye padaya tha
Kya tumhein yehi sab sikhaya tha
Ki apney ilm par Guroor karo
 
Apney nafs ko masroor karo
Jab bhi bolo to bas galat bolo
Zulm dekho to lab nahi kholo
Chorkar deen bhool kar mazhab
Apni auqaat note main taulo
Sach batao ki kya ye qissa hai
Kya ye andaaz meri tarbiyat ka hissa hai
Mujhko afsos nahin ke tu mujhey bhool gaya
Ranj ye hai ki mera jeena hi fizool gaya
Main to Jee key bhi roz marti hoon
Main tujhey roz yaad karti hoon
Jis tarah jeeney ka agaaz kiya hai tuney
Uskey anjaam se main darti hoon
 
Khuda karey ki tujhey ab bhi samajh aa jaye
Koi to aakey tujhey seedhee raah dikha jaye
Ki ikhtitaam ho teri gunah ki shaamon ka
Mujhey bhi ajr miley terey naik kaamon ka


Mahtab Alam (Mushk)

Hangama-e-Gam se tang aakar izhaar-e-musarrat kar baithe
mashhoor thi apni zindaadili, daanistaa sharaarat kar baithe

koshish to bahot ki hamane magar, paayaa na Gam-e-hasti ka mafar
viraani-e-dil jab had se badhii, ghabaraa ke mohabbat kar baithe


nazaro se na karate pursish-e-Gam, Khaamosh hi rahna behtar tha
diwaano ko tumane chhed diyaa wallaah qayaamat kar baithe


har cheez nahi ek markaz par, ek roz idhar ik roz udhar
nafrat se na dekho dushman ko, shayad ye mohabbat kar baithe


Akhtar

Talaash kar

Meri taqdeer say pooch meri kismat ka faisla
Meri muskurahat pe na ja mera dard talaash kar
Ankhon say pooch mere intezaar ki had
Itminan pe na ja mere sabr ko talaash kar
Mere doston say pooch meri dosti ka alam
Surat pe na ja meri seerat talaash kar.

Mahtab Alam (Mushk)

Wafaa Nahi Hoti

Dost To Bahut Hain Magar Wafaa Nahi Hoti
Har Gire Hue Ghoonghat Mei Hayaa Nahi Hoti.

Apni Ana Ko Har Cheez Pe Qurban Kar Dete Hain
Magar Dosti Se Piyari koi Anaa Nahi Hoti.

Us Ke Har Sitam Ko Hans Ke Seh Lete Hain
Jo Dost Sitam De Woh Sazaa Nahi Hoti.

Har Dard Ka Elaaj Maujud Hai Is Duniya Mei
Lekin Jo Dost Zakhm De Uski Dawaa Nahi Hoti.

Dil Aur Aayene Mei Faraq Sirf Itna Sa Hai
Jab Dil Toot ta hai To Us Ki Sadaa Nahi Hoti.

Mahtab Bure Se Bhi Bad Tar Hai Wo Insaan
Jis Mei Apne Doston Ke Liye Wafaa Nahi Hoti.

Mahtab Alam (Mushk)

Misaal Kar Daala

Mohabbaton Ne Kaisa Kamaal Kar Daala
Humain To Udasiyon Ki Misaal Kar Daala.

Kabhi Milein To Poochhein Ge Ek Dooje Se
Ke Kis Ko Kis Ke Gam Ne Nidhaal Kar Daala.

Tu Bata Us Se Kiya Kahoon Ga Main
Meri Udasi Pe Jo Kisi Ne Sawaal Kar Daala.

Suna Tha Zindagi Ka Safar Mushkil Hai
Humne Karke Mohabbat Aur Bhi Mahaal Kar Daala.

Kuchh To Hum Bhi Moam Ke The Aur Kuch
Tumne Bhi Zindagi Ko Shoulon Ki Shaal Kar Daala.

Mahtab Alam (Mushk)

Raha Hai Koi

Bahut Qareeb Aa Kar Door Ja Raha Hai Koi
Dosti Ka Haath Mila Kar Door Ja Rha Hai Koi.

Char Din Ki Zindagi Hai Phir Wapas Jana Hai
Phir Kyun Mujh Ko Behad Sata Raha Hai Koi

Mere Hisse Ki Zindagi Bhi Us Ke Naam Kar De
Baargah-E-Elahi Mei Haath Utha Raha Hai Koi.

Zindagi Bhar Kabi Bhi Hum Judaa Na Hon Ge
Wo Waade,Wo Qasmein Bhula Raha Hai Koi.

Wo Haath Jin Se Hameesha Duaein Mangein Thein
Aaj Unhein Haathon Se Mayyat Saja Raha Hai Koi.

Mahtab Alam (Mushk)

wo bhi nahi main bhi nahi

Larzishon ko manta wo bhi nahi main bhi nahi
Dono insan hain khuda wo bhi nahi main bhi nahi.
Wo mujhe aur main use ilzaam deta hoon
Khud apne andar jhankta wo bhi nahi main bhi nahi.

Mahtab Alam (Mushk)

Mujhe Bas Itna Samjhao

kabhi Tum Laut Ke Aao Mujhe Bas Itna Samjhao
Kahan Se Seekh Li Tum Ne Ada Mujh Ko Bhulane Ki
Tumhe Mujh Se Shikwa Tha Ya Koi Bhi Shikayat Thi
Zehmat To Zara Si Thi Na Ki Koshish Bataane Ki
Bhala Yun Chhor Ke Apna Koi Apnon Ko Jaata Hai
Musalsal Dukh Ki Barish Mei Jeewan Bhar Rulata Hai
Abhi To Rait Geeli Hai Abhi Sab Naqsh Baqi Hain
Gaye Qadmon Pe Laut Aao Mujhe Bus Itna Samjhao.

Mahtab Alam (Mushk)

Jiya Karta Hai

Ye Na Socho Ke Faqat Naam Liya Karta Hai
Aik Deewana Teri Aahat Mei Jiya Karta Hai.

Wo Janta Hai Ke Tu Us Ke Muqaddar Mei Nahi
Phir Bhi Har Roz Tujhe Yaad Kiya Karta Hai.

Kuch Nahi Mangta Rab Se Kabhi Apne Liye
Teri Khushiyon Ki Dua Mang Liya Karta Hai.

Raat Ko Yaad Mei Teri Jo Tarapta Hai Dil
Chand Se Ja Ke Teri Baat Kiya Karta Hai.

Kuch Nahi Chahta Tum Se Apni Chahat Ka Sila
Ye Deewana To Faqat Pyar Kiya Karta Hai.

Mahtab Alam (Mushk)

Woh Basa Nahi

Gam-E-Zindagi Teri Raah Mei
Shab-E-Arzoo Teri Chaah Mei.

Jo Ujar Gaya Woh Basa Nahi
Jo Bichhar Gaya Woh Mila Nahi.

Woh Jo Dil-O-Nazar Ka Saroor Tha
Mere Paas Reh Kar Bhi Door Tha.

Woh Hi Ek Gulaab Ummeed Ka
Mere Shakh-E-Jaan Pe Khila Nahi.

Mujhe Manzilon Ki Khabar Nahi
Use Raaston Ka Pataa Nahi.

Mahtab Alam (Mushk)

Kabhi Main Yaad Aaon To

Kabhi Main Yaad Aaon To.......
Mujhe Bas Itna Kehna Hai, Kabhi Main Yaad Aaon To
Kabhi Tanhayi Ki Raaten Tumhen Zyada Satayen To
Kabhi Titli Na Bole To, Aur Jugnoo Laut Jayen To
Kabhi Jab Dil Bhi Bhar Jaye, Koi Jab Sun Na Paye To
Kabhi Jab Dost Saathi Bhi Jo Tum Se Rooth Jayen To
Kabhi Jab Khud Se Larkar, Thakan Se Choor Ho Jao To
Kabhi Chahte Houe Bhi Khud Akele Ro Na Pao To
Apni Aankhon Ko Band Karna, Mujhe Awaaz De Dena
Phir Mere Tasawwur Se Jo Chahe Baaten Keh Dena
Mere Kandhe Pe Sir Rakh Kar Tum Jitna Chahe Ro Lena
Khushi Ya Dukh Mei Jab Bhi Tum Kabhi Dilse Pukaaro Ge
Hamain Tum Paas Pao Ge, Hamain Tum Saath Pao Ge.

Mahtab Alam (Mushk)

Muntazir

Jisne andaaz dia mujhe muskuraane ka,
use hi shauk hai ab mujhe faqat rulaane ka.
Jo lahron se cheerkar mujhe laaya tha kinare,
wohi muntazir hai ab mere doob jaane ka.

Mahtab Alam (Mushk)

Kyu

Apne haatho se yun chehre ko chupate kyun ho,
Mujh se sharmate ho tou saamne atay kyun ho...

Tum kabhi mere tarha kar bhi lo ikraar-e-wafa,
Pyar karte ho tou phir pyar chupate kyun ho...

Ashq Aankho Mei Mere Dekh Ke Rote Kyun Ho

Dil Bhar Aata Hai To Phir Dil Dukhate Kyun Ho

In se vaabasta hai jab mera muqadar phir tum,
Mere shano se ye zulf hatatay kyun ho...


Roz mar mar ke mujhe jeenay ko kehte kyun ho,
Milne aatay ho to phir laut ke jatay kyun ho...

Mehsher

Bara maza ho jo mehsher mei hum karen shikwa
Woh minnaton sey kahen chup raho Khuda key liye.

Mahtab Alam (Mushk)

Sham ke Baad

Ankh ban jati hai sawan ki ghata sham ke baad,
Laut jata hai agar koi khafaa sham ke baad.
Maar deta hai ujar jaane ka woh dohra ehsaas,
Kaash ho koi na juda kisi se kabhi sham ke baad.

Mahtab Alam (Mushk)

Bhula dete hain

Mujh mei kya hai jo mujhe yaad krega koi,
Achhe achhon ko yahan log bhula dete hain.

Mahtab Alam (Mushk)

Qaatil

Sab ke honton pe tabassum tha mere qatl ke baad,
Jaane kya sonch ke rota raha mera Qaatil tanhaa.

Mahtab Alam (Mushk)

Talabgaar

Dil tujhe rooh se paane ka talabgaar hai warna,
Log milte hain tere saath ke har raahon mein.

Mahtab Alam (Mushk)

Ab Bhi Waisi Hai

Mere jazbon ki sachchayi ab bhi waisi hai,
Us ke bin meri tanhaayi ab bhi waisi hai.
Ab kya ahsaas dilana usko apne dard ka,
Us ki jo thi laaparwaahi, ab bhi waisi hai.

Mahtab Alam (Mushk)

Yaad bhi rakha

Ehsaas tera hum ne tere baad bhi rakha,
Bhoole bhi tujhe aur tujhe yaad bhi rakha.
Ojhal bhi kiye rakha tujhe aankhon se apni
Khawabo ki tarah aankho mei aabad bhi rakha.

Mahtab Alam (Mushk)

kuchh bhi nahi

Jiss ko chaha wohi kehta hai wafa kuchh bhi nahi
Aisa lagta hai mere pass raha kuchh bhi nahi.
Yoon bhi uss ne mujhe faraamosh kiya
Sun ke har baat meri jaise suna kuchh bhi nahi.
Bahut veeraan si ho gayi hai zindagi meri
Woh jab se chorr gaya, mere pass raha kuchh bhi nahi.

Mahtab Alam (Mushk)

Gubbaron

Ab mujhe wafa sikhane lage, who badtameez log,
Dil tod diya karte the, jo aadatan ghari ghari.
Kya kamzarf ho gaye hain, zamane ke shaks-o-aam,
Gubbaron ki tarah fool jaate hain, jo thodi hawa mili.
Yaadon mei jiski basaa karte the, usko hi bhula diya,
who jaata raha door aur tumne ek awaaz tak na di.

Mahtab Alam (Mushk)

Rona aya

najane kyun toot ke apni babasi par rona aya
dusron ko nahin main ne apnon ko hi aazmaaya.
hum doston ki tanhayi ko door karte chale lekin
par khud ko kyun har mor par tanha paya.

Mahtab Alam (Mushk)

ke bas

Aisa toota hai tamannaon ka pandaar ke bas
Dil ne jhelen hain mohabbat main wo aazaar ke bas
Ek jhamake main zamane mere hathoon se gaye
Yun munh pher ke badli, waqt ki raftaar ke bas
Tu kabhi rakh ke hame dekh to bazaar ke beech
Is tarah toot ke aayenge kharidaar ke bas.

Mahtab Alam (Mushk)

Badal gayi

Suraj dhala tu saaye ki surat badal gayi
waqt para tu gehri rafaaqat badal gayi.
main ik umar tak uski zaroorat bana raha
phir yoon hua ki uski zaroorat badal gayi.

Mahtab Alam (Mushk)

Pehle si

chand to nikla tha magar raat na thi pehle si
yeh mulaqaat, mulaqaat na thi pehle si
ranj kuch kum to huwa tere milne se aaj
yeh baat alag hai ke, baat na thi pehle si.

Mahtab Alam (Mushk)

Yaad rakhta hoon

Mein logon se mulaqaton ke lamhe yaad rakhta hoon
Mein baatain bhol bhi jaoon to lahje yaad rakhta hoon
Sar e mehfil nigahain mujh pe jin logon ki parti hain
Nigahaun ke hawale se woh chehre yaad rakhta hoon.

Mahtab Alam (Mushk)

Nikaaley jaate

khud-ba-khud chor gaye hain to chalo acha hua
Itney ehbaab kahan ham se sambhaley jaate.
Hum bhi Ghalib ki tarah koocha-e-Jana se Mushk
Na yuhin khud nikalte to kisi roz Nikaaley jaate.

Mahtab Alam (Mushk)

Yaqeen

mujhe apne kirdaar pe itna to yaqeen hai mahtab
koi mujhe chhor to sakta hai magar bhula nahi sakta.

Mahtab Alam (Mushk)

Mosafir

har ek paon mujhe rondta hoa guzra
najane konsi manzil ki mosafir hun main.

Mahtab Alam (Mushk)

hawaa... jab... tez chalti hai...to....patte.... toot jaate hain;
museebat.... ke dinon mein ...achchhe achchhe ...toot jaate hain.

bahut ...majboor hain hum .....jhooth.. to ....bolaa nahin jaataa;
agar...... sach... bolte hain hum ...to....rishte ...toot jaate hain.

bahut mushkil sahi...fir bhi....mizaaj ....apnaa badal lo tum ;
lachak ....jin mein nahin hoti ...taneY ...wo toot jaate hain.

bhale hi...der se aaye....magar...wo ...waqt aataa hai;
haqeeqat .....khul hi jaati hai....mukhote... toot jaate hain.

abhi.... duniyaa nahin dekhi ....tabhi ..wo....poochhte hain ..ye;
kisi kaa... dil...kisi ke.... khwaab ...kaise....toot jaate hain.

itnaa hi ....kyaa kam hai....tumhe.. wo ....dekhte to hain;
agar... kuchh raushni ho... to.... andhere toot jaate hain..........


Akhtar Alam

Nahi hoti hai

kaise keh doon ki mulaaqaat nahi hoti hai,

roz milte hai magar baat nahi hoti hai

aap lillaah na dekhaa karein aainaa kabhi
dil kaa aa jaanaa badi baat nahi hoti hai

chhup ke rotaa hoon teri yaad me duniya bhar se
kab meri aankh se barsaat nahi hoti hai

haal-e-dil puchne waale teri duniyaa me kabhi
din to hota hai magar raat nahi hoti hai

jab bhii milte hain to kahate hain kaise ho "Akhtar"

is se aage to koi baat nahi hoti hai

Magar Waada Nahin Karta

Tumhein Main Bhool Jaoon Ga, Magar Waada Nahin Karta
Humeisha Muskuraoon Ga, Magar Waada Nahin Karta

Tumhari Har Nishaani Ko Main Dariya Burd Kar Doon Ga
Tumharey Khat Jala Doon Ga, Magar Waada Nahin Karta

Tumhara Zikar Mehfil Mein Huwa To, Khamosh Rehna Hai
Main Khud Ko Aazmaoon Ga, Magar Waada Nahin Karta

Tujhey Waapis Bulaana Hai, Na Deni Hai Sadaa Koyi
Main Yoon Dil Ko Manaoon Ga, Magar Waada Nahin Karta

Chalo Ye Teh Huwa Humdum, Hijr Ke Geet Koyi Bhi
Kabhi Na Gungunaoon Ga, Magar Waada Nahin Karta

Chalo Tum Say Ye Waada Hai, Ke Dil Mein Dard Hain Jitney
Kisi Ko Na Sunaoon Ga, Magar Waada Nahin Karta

Sitaaro Neend Ke Maaro, Chalo Khuwabon Ki Duniya Mein
Main Bhi So Hi Jaoon Ga, Magar Waada Nahin Karta

Chalo Ye Tum Say Waada Hai, Koyi Bhi Qeemti Moti
Na Aankhon Say Giraoon Ga, Magar Waada Nahin Karta.

Mahtab Alam (Mushk)

Wafaa

Mujh se meri wafa ka fasaana to sun liya,
itna bhi na kaha ke zamaana kharaab tha.

Mahtab Alam (Mushk)